
	ՏԱՊԼԱ


2 ժամ		10 անձի		Հայկական

	Բաղադրություն
	3 բ. ալյուր ½ բ. շաքարավազ 2 թ. գ. թթխմոր 1 ճ. գ. յուղ կամ ձեթ 3 ճ. գ. մեղր 2 ճ. գ. ընկույզ 2 ճ. գ. չամիչ ջուր

Պատրաստություն

• Շաղել խմորը, թողնել հանգչի:
• Պատրաստել կլոր նկանակ, մեջը դնել միջինք, վրան խրել ընկույզ և չամիչ:
• Թխելուց հետո, երբ հանում ենք փռից, վրան քսել մեղր:


	ՀԱՏԻԿԱՊՈՒՐ


1 ժամ		10 անձի		Հայկական

	Բաղադրություն
	½ բ. լոբի ½ բ. սիսեռ ½ բ. ոսպ ½ բ. ձավար ½ բ. բրինձ ½ բ. ոլոռ ½ բ. եգիպտացորեն ½ բ. ընկույզ ½ բ. չիր 3 ճ. գ. յուղ կամ ձեթ 2 ճ. գ. ալյուր 2 սոխ կանաչի կարմիր և սև պղպեղ դաղձ, ուրձ

Պատրաստություն

• Նախապես թրջել, ապա խաշել հատիկեղենը:
• Ավելացնել մանրացված ընկույզն ու չրերը:
• Ալյուրը բացել ջրով և լցնել ապուրի վրա:
• Ավելացնել սոխարածն ու կանաչին և համեմել:


	ՀԱՄԲԱՐՁՄԱՆ ԱՊՈՒՐ


½ ժամ		4 անձի		Արցախ

	Բաղադրություն
	2 բ. արիշտա 3 բ. կաթ 2 ճ.գ. կարագ 5 ճ.գ. շաքարավազ դարչին, հիլ

Պատրաստություն

• Խաշել և ջրքամել արիշտան:
• Եռացող կաթի մեջ լցնել արիշտան, կարագն ու շաքարավազը և եփել մինչև կիսվի կաթը:
• Մատուցել վրան ցանելով հիլ և դարչին:


	ՍՊԻՏԱԿ ՇՓՈԹ


½ ժամ		4 անձի		Արցախ

	Բաղադրություն
	1 բ. հաճար 1 լ բացված չորաթան* յուղ աղ

Պատրաստություն

• Թրջել հաճարը նախորդ օրվանից, ապա ջրքամել և հարել, մինչև ամբողջությամբ սպիտակի:
• Եփել ջրով, անընդհատ հարելով, մինչև շիլայի վերածվի:
• Մատուցելիս կողքերը լցնել եփած չորաթանը, իսկ մեջտեղում` լցնել յուղ:

* Չորաթանը փոխարինել 1 լ մածունը եփելով 1 ձվով և 1 ճ.գ. ալյուրով:


	ՁՈՒԿ


1 ժամ		3 անձի

	Բաղադրություն
	1 ձուկ 50 գր կարագ ½ լիմոնի հյութ կարմիր և սև պղպեղ ծիթրոն աղ

Պատրաստություն

• Համեմել ձուկը, վրան քսել կարագ և եփել փռի մեջ միջին ջերմաստիճանով, մինչև ձկան աչքերը դուրս գան:

Զատկի նախօրեն պահք լինելով, այն լուծարում են ձկով. այդ իսկ առիթով զատկի սեղանի մսեղենը ձուկն է :


	ՁՈՒԿ` ԳԻՆԻՈՎ


40 րոպե		4 անձի

	Բաղադրություն
	1 իշխանաձուկ 1 բ. կարմիր գինի 50 գր կարագ համեմ դափնետերև հատիկ սև պղպեղ աղ

Պատրաստություն

Կտրատել ձուկը, բոլոր բաղադրիչները լցնել վրան և եփել մարմանդ կրակով, մինչև ձկան աչքերը դուրս գան: Կրակն անջատելուց 5 րոպե առաջ ավելացնել մանրացված համեմը:

Զատկի նախօրեն պահք լինելով, այն լուծարում են ձկով. այդ իսկ առիթով զատկի սեղանի մսեղենը ձուկն է:


	ԼԱՎԱՇՈՎ ՁՈՒԿ


1 ժամ		2 անձի

	Բաղադրություն
	1 ձուկ 1 լավաշ 1 լիմոնի հյութ 2 ճ.գ. ձեթ 1 պճեղ սխտոր կարմիր և սև պղպեղ ծիթրոն աղ

Պատրաստություն

Ձեթոտել և համեմել ձուկը, լիմոնն ու սխտորը կտրատել և դնել փորի մեջ:

1 ժամ անց , հանել սխտորն ու լիմոնի շերտերը, փաթաթել լավաշով և եփել փռի մեջ միջին ջերմաստիճանով, մինչև լավաշը չորանա և կարմրի:


	ԿԼՈՒՐՈՎ ՄԱԾՆԱՊՈՒՐ


1 ժամ 30 րոպե		8 անձի		Մուսալեռան

Բաղադրություն

ապուրի համար
1 լ մածուն
1 ձու
1 ս.բ. բրինձ
50 գր կարագ
անանուխ
աղ
կլուրի խմորը
½ կգ ծեծած միս
½ կգ մանր կորկոտ
1 ճ.գ. պղպեղի մածուկ
քիմիոն
կարմիր և սև պղպեղ
աղ
միջուկը
½ կգ աղացած միս
1 սոխ
½ բ. աղացած ընկույզ
ձեթ
դարչին
կարմիր և սև պղպեղ
աղ

Պատրաստություն

• Պատրաստել միջուկը. սոխարածի վրա ավելացնել աղացած միսը, համեմել և եփել. լցնել ընկույզը և կրակն անջատել. թողնել սառչի:
• Շաղել պատյանի խմորը խառնելով բոլոր նյութերը. երբեմն ձեռքերը թրջել ջրի մեջ և ափով մի քիչ ջուր ցանել խմորի վրա և շարունակել շաղել: Խմորը պիտի լինի փափուկ, բայց ոչ ջրոտ, այնպես որ հարմար լինի բացելու կլուրները:
• Պատրաստել կլուրները, սովորական կլուրի (քյուֆթա, կոլոլակ) եղանակով:
• Մածունը հարել ձվով, եռացնել. լցնել բրինձն ու եռման ջուր և շարունակել եռացնել:
• Մատուցելուց 20 րոպե առաջ, տաք ապուրի մեջ ավելացնել կարագը, անանուխն ու կլուրները: Երբ եռալուց կլուրները բարձրանան ապուրի երեսին, նշանակում է այն պատրաստ է:

Զատկի սեղանին Մուսալեռցիք պատրաստել են այս ապուրը:


	ՉՐԵՐՈՎ ՓԼԱՎ


1 ժամ 10 րոպե		6 անձի

	Բաղադրություն
	2 բ. բրինձ 3 ճ.գ. յուղ 1 բ. տարբեր չրեր, չամիչ և ընկուզեղեն լավաշ աղ

Պատրաստություն

• Բրինձը թեթևակի խաշել եռացող աղաջրի մեջ. երբ հատիկները եռացող ջրի երեսը բարձրանան, այն դատարկել փլավքամիչի մեջ, սառը ջրով ողողել:
• Մեծ կաթսայի հատակին մի քիչ յուղ քսել, լավաշի կտորները տարածել և վրան լցնել կիսախաշ բրինձը: Մի քիչ աղ ցանել, տեղ – տեղ յուղ դնել, կափարիչը ծածկել սրբիչով, փակել կաթսան և մարմանդ կրակով թրմել փլավը մոտավորապես 30 րոպե:
• Մանրացնել չրերը և ½ ճ.գ. յուղով տապակել, ավելացնել 1 ս.բ. ջուր և շարունակել եփել:
• Մատուցելիս փլավի կեսը ծածկել լավաշի մանրացված քերանքով, իսկ մյուս կեսը չրերով:

Զատկի սեղանին զարդը հանդիսանում է լավաշով – չրերով փլավը:


	ԱՂԱՆՁ


1 ժամ		6 անձի

	Բաղադրություն
	2 բ. ձավար ½ բ. սիսեռ 1 բ. կանեփ ½ բ. ընկույզ աղ

Պատրաստություն

• Լվանալ և չորացնել ձավարն ու կանեփը:
• Թրջել մի քանի ժամ, ապա հանել ջրից և ցամքեցնել սիսեռը:
• Յուրաքանչյուրը առանձին-առանձին բովել տապակի մեջ, մարմանդ կրակով, անընդհատ խառնելով:
• Սառչելուց հետո, խառնել իրար, ավելացնել ընկույզը:

Կարող էք խառնել նաև այլ ընկուզեղեներ. օրինակ բոված ու մանրացված նուշ, ծիրանակուտ, կաղին, արևածաղկի սերմ, դդմի կուտ և այլն..., ինչպես նաև չամիչ և թթի չիր:


	ՀԱՐԻՍԱ


2 ժամ		6 անձի

	Բաղադրություն
	1 կգ ձավար 1 կգ միս աղ

Պատրաստություն

• Մսի վրա ջուր լցնել, եռացնել և մաքրել վրայի փրփուրը:
• Խաշվող մսի վրա ավելացնել ձավարը և մարմանդ կրակով եփել մինչև ամբողջությամբ փափկեն:
• Եթէ ցանկանում էք այն լինի հարիսա, պետք է հարել, մինչև համասեռ դառնա. իսկ ամանորյա քյաշկը չենք հարում. միսը կտորներով պիտի երևա ճաշի մեջ:

Մատուցելիս առաջարկել յուղով սոխառած, կարագ կամ տապակած դմակ. իսկ համեմունքներից կարմիր և սև պղպեղ, քիմիոն և դարչին: Տարբեր շրջաններում տարբեր համեմունքներով են օգտվում:


	ՂԱՓԱՄԱ


3 ժամ		15 անձի

	Բաղադրություն
	1 միջին դդում 1 բ. բրինձ 1 բ. չրեր 1 բ. ընկուզեղեն 1 ս.բ. ձեթ (կամ 2 ճ.գ. յուղ) դարչին բահար աղ

Պատրաստություն

• Կտրել դդումի գլուխը,այնպես որ կափարիչ լինի իրեն: Ապա մաքրել դդումի միջուկը:
• Մանրացնել չրերն ու ընկուզեղենը և տաքացնել յուղի մեջ:
• Ավելացնել բրինձը, համեմել և լցոնել դդումը,այնքան որ կեսին հասնի:
• Լցնել ջուրը ծածկելով բրինձը:
• Ծածկել դդումի բերանը իր իսկ կափարիչով և եփել փռի մեջ մարմանդ կրակով, մինչև ջուրը ներծծվի և բրինձն ու դդումը եփված լինին:

Կերակրացանկ

Սիրով Սոնիայից